Localisation:


Menu:
Internetowa Liturgia Godzin

Die 29 septembris
SS. MICHAELIS, GABRIELIS ET RAPHAELIS
ARCHANGELORUM
Festum

Sexta



V. Deus, in adiutórium meum inténde.
R. Dómine, ad adiuvándum me festína.
Glória Patri, et Fílio, et Spirítui Sancto.
Sicut erat in princípio, et nunc et semper,
et in sæcula sæculórum. Amen. Allelúia.


Rector potens, verax Deus,
qui témperas rerum vices,
splendóre mane ínstruis
et ígnibus merídiem,

Exstíngue flammas lítium,
aufer calórem nóxium,
confer salútem córporum
verámque pacem córdium.

Præsta, Pater piíssime,
Patríque compar Unice,
cum Spíritu Paráclito
regnans per omne sæculum. Amen.

Vel:

Dicámus laudes Dómino
fervénte prompti spíritu;
hora volúta séxies
nos ad orándum próvocat.

In hac enim fidélibus
veræ salútis glória,
beáti Agni hóstia,
crucis virtúte rédditur.

Cuius luce claríssima
tenébricat merídies;
sumámus toto péctore
tanti splendóris grátiam.

Deo Patri sit glória
eiúsque soli Fílio
cum Spíritu Paráclito,
in sempitérna sæcula. Amen.


Qui plures Horas dicit, in una Hora sumit psalmodiam currentem, in ceteris - complementarem.

Ant. Ecce Gábriel, quem víderam in visióne, cito volans tétigit me et dócuit me.


Psalmi de feria currente


Ant. Ecce Gábriel, quem víderam in visióne, cito volans tétigit me et dócuit me.


Dan 9, 22-23

Gábriel ángelus locútus est mihi dixítque: Dániel, nunc egréssus sum ut docérem te et intellégeres. Ab exórdio precum tuárum egréssus est sermo; ego autem veni ut indicárem tibi quia vir desideriórum es tu; ergo animadvérte sermónem et intéllege visiónem.

V. Benedícite Dómino, omnes virtútes eius.
R. Minístri eius, qui fácitis voluntátem eius.



Orémus. Deus, qui miro órdine angelórum ministéria hominúmque dispénsas, concéde propítius, ut, a quibus tibi ministrántibus in cælo semper assístitur, ab his in terra vita nostra muniátur. Per Christum Dóminum nostrum. Amen.


Saltem in celebratione communi, additur acclamatio:

V. Benedicámus Dómino.
R. Deo grátias.



 Based on LITURGIA HORARUM IUXTA RITUM ROMANUM (editio typica)